عمري سفر

أصحى كما يصحى المعاطيش
واركض كما طرّاد الارزاق
معْ كل شمسٍ تشرق آعيش
كذا.. واذا بالعمر سرّاق
وْلا تسأليني لي متى وْ ليش
الأسئلة: ترهقني إرهاق
واحد أنا من هالدراويش
لي مالهم من يدٍ وساق
ورى العدي في لقمة العيش
ياكثر ما نحلم ونشتاق
اقول لم بس ايش والا ايش
والضيق ما قصّر فالأوراق
لي ذاكره مليانةٍ طيش
وأصحاب وأهل وليل عشاق
يا خذني النسيان بشويش
وتشدّني ووثاقها وثاق
تشوفها عيني مراهيش
ويحسّها قلبي طفل عاق
لو ليلةٍ ترضى ببخشيش
خذيت صبح الله بالأعناق
وْلو تعرفي متنا على ويش؟
وْلويش نحيا.. خاطرك ضاق
ما نامت أشعاري على ريش
يالونها الباهت ف الأعماق
فلا الكتابة وكّلت عيش
ولا السكوت أحيان ينطاق
عمري سفر ونقاط تفتيش
وموادع وتغريب وفراق
وأزمة فكر وأزمة خفافيش
وأزمة قصايد وأزمة أخلاق
والحمد لله قادر آعيش
واحب مثل الناس واشتاق
درويش يا ستّ الدراويش
كلي أمل في رب الأرزاق