الأطلال للعضيدان

من قصائد الامس

قصيدة للشاعر أحمد بن محمد الحمدان العضيدان رحمه الله
ملن عيوني من بكاهن للأطلال
وشوف الرسوم الخاليات أذكرنيا
وتعاود الذكرى ليا شفت منزال
وشوارعٍ عقب الونس يوحشنيا
الله وأكبر كيف بالسرع تنجال
راحت كحلم الليل مايرجعنيا
راحت كحلم الليال والحلم ينجال
وباقي من الذكرى جروحٍ سطنيا
من شوفتي للرسم بالقلب غربال
ودموع عيني فوق خدي جرنيا
أخذت فيها وقت والوقت ماطال
ياصاحب السرعه طواه الزمنيا
كم مرّ مع ذيك الشوارع من أزوال
إن حدرن من شارعٍ أو رقنيا
وكم من هنوفٍ تقصر المشي تختال
وغض الشباب بزين عوده فتنيا
وحجيجه كالنون والرمش قتّال
إن سلهمت بعيونها وأخثرنيا
فيه إلتفات الريم إن صابه جفال
في خايعٍ عقب المطر ذيرنيا