تاريخ يشهد له على طيب الأفعال

البارحه دمعي على العين همال
إلى حد نصف الليل ولاجاني النوم
يوم قيل أبو فيصل عن الدار رحال
الدايم الله والمخاليق ماتدوم
هذا الأجل مكتوب في سجل الاعمال
عساه في الجنه وعن النار معصوم
في جنة الفردوس يا شيخ الأبطال
ويشرب من الصافي رحيق ومختوم
فقيدة الأمه على مر الأجيال
والله من يبكي فلا هوب مليوم
عزاي بالله ثم اعزي الانجال
نجم دفن بالعود هو خامس انجوم
بكت عليه البيض بدموع تنهال
وحمر النواظر صابها حزن وسهوم
كل الدول جاها من البين غربال
على زعيم هيبته هزة الروم
مناقبه ما تنحصي كبار وجبال
لمقدسات الدين وابلاده عموم
مكه وطيبه في عيونه على البال
وطباعة المصحف على أنواع ورقوم
تاريخ يشهد له على طيب الأفعال
محد تعلى المجد مثله وزيزوم
ما قدمه يلقاه لو وزن مثقال
ومن جا الحرم يدعي ولو طفل مفطوم
هلت دموع الشعب حرمه ورجال
عقب الخبر كني على الوجه ملطوم
الموت حق والعمر لو بنا طال
نرحل عن الدنيا تقل كنها حلوم
لا غاب حاكم ظهر عقبه ارجال
ما فيه فرق بين قبل أمس واليوم
نمسح دموع العين بوجود الأبطال
نور البلاد ولا على جوها غيوم
عاش أبو متعب طيب الجد والخال
إمام للاسلام والشعب ملموم
الفيصلي الصيرمي واسع البال
قايد مسيرتنا على الخير قيدوم
حييت يا سلطان يا طيب الفال
يا ابن الامام اللي لك المجد مرسوم
يا طيب السيرة لك المجد تفصال
دوحه تظل الشعب عن حر وسموم
من شوفتك يا اميرنا الهم ينجال
غيث الوطن واللي على قلبه اهموم
انتم هل العوجا عزيزين واجلال
ولا فيه فرق بين حاكم ومحكوم