يوم الوداع

القلب ضيّع دليله
يشكي ونين الجرح ذاق الهوايل
الهم يكبر والمواجع ثقيله
ودموع عينه بالمحاجر دلايل
يذكر مع الايام ذكرى جميله
ولا يسمع العذال قولٍ وقايل
الحزن ذاك الحزن اكبر حصيله
ويوم الوداع الشعر جاب المثايل
يكتب وذاك الهم قصه طويله
والجرح وسط القلب صايل وجايل
يمكن مع الايام صدفه يجيله
والا يجي له علم بذيك الرسايل
من فارق الاحباب واعزتي له
يسال عن الاسباب بكل الوسايل
يسهر وهمه في ضلوعه يشيله
ونين ذات الروح للروح طايل
تكفون زهر الريف هذا مخيله
وسط الجبل تكفون بديار حايل
وصفه وذاك الوصف ماحد مثيله
والقول يفرق بين وصف الفعايل
وذاك الوداع المر اثبت دليله
ذاق العناء وايام سود الهوايل