عز العروبة كحيلان

اعوذ بالرحمن من كل شيطان
ومن الغدر ومن الحسد والعمايل
وإلى ابتدى ليل القصايد والالحان
بديت واشفيت النفوس الغلايل
وذبيت في راس الطويلة مسيان
والحيل مامن حيل والدمع سايل
ومن البكا سالت ملازم ووديان
وحتى الطويلة من دموعي تهايل
وبكوا على صوتي شغاميم نجران
وبكوا على صوتي شغاميم حايل
عليك ياعز العروبة اكحيلان
عز العرب رمز الوفا والجمايل
ملك ومتواضع وللعز عنوان
حذفك بعيد وشبر يمناك طايل
اسمك الحاله يرجح بكل ميزان
وذكرك مابين الناس صايل وجايل
من لا انجبت مثلك على مر الأزمان
احسن لها تبقى على طول حايل
ومن لانهج نهجك على سنان وعنان
ماظنتي يدعى صبي الصمايل
تركتنا في عز في امن وامان
وانعام ما تحصى وخير وفضايل
موتك فجيعه حلت بكل الأوطان
من هولها شفنا نجوم القوايل
العزوه اللي لكتسى الجو دخان
افعالهم تلغي جميع الفعايل
نرسل عزانا صوب ذربين الايمان
ونجدد البيعه بكل الوسايل
ونرفع يدينا كلنا سر واعلان
وندعي لهم بالفرض والا النفايل
على العهد باقين انصار واعوان
ماخانوا العشره اعيال الحمايل
ما عندنا باير وكاذب وخوان
نصدق مثل صادق حقوق المخايل
لعيون عبدالله ولعيون سلطان
ناقف ونردع كل غازي وعايل
هذي عوايدنا كراماً وشجعان
والي نوينا يعتدل كل مايل
ناتي كذا شجعان صقهان عميان
ونذود دون معوبسات الشمايل
حنا نهار الضيق رئاسة اركان
حنا الكتايب واللوا والفصايل
حنا لقادتنا محازم وفرسان
ضد الغدر ضدالجهل والتحايل
من عهدنا الاول إلى عهدنا الان
وحنا على نهج الجدود الاوايل
والحكم لال سعود والضد خسران
وعندي على قولي شهود ودلايل
ومن لا اعتبر يقلط على السيف شامان
وماله عن الموت المحقق بدايل
اقولها من قلب يغشاه الايمان
واعيدها لاقيل ويش انت قايل؟
وان ودع بليهان ياتي بليهان
وحنا بامن وامان والشك زايل