فرقا المحبين

يا عين لا تبكين يا عين تكفي
يكفى ترى يا عين شفت الهوايل
ذقت العنا يا عين بالقلب جرحين
وش حيلتي يا عين والقا وسايل
يا عين لا تبكين فرقا المحبين
اللي عليهم هل دمعي وسايل
يا عين يكفي دمعك اللي تهلين
يكفي دموعك عقب أهل الفعايل
تفرقوا أصحابي اللي عزيزين
راحوا وأنا صبري على آلهم طايل
تفرقوا يا عين ناس مخاوين
ربعي وخلاني رجال أصايل
تفرقوا أصحابي اللي موالين
أصحابي اللي كاسبين الجمايل
من عقبهم اشكي من البعد والبين
واصبر وكن القلب وسطه فتايل
تصليه عقب اللي على القلب غالين
أحباب قلبي حاملين الثقايل
تفرقوا في تالي الوقت يا عين
وقت غريب كيف يا ويش قايل
فرّق حبايب قلبي اللي سلاطين
الكل في حاله ولا حد بسايل
وقت تغير ما عرفناه بالزين
شتت جميع الناس بعد وعزايل
وعيب علي يا عين تبع المقفين
هذا المثل معروف زين المثايل
مير الوفي قدره على الراس والعين
يبقى عزيز جعل وقته سهايل
نفل محمد الصخيبري