يوم انقضت حاجته لوّح ودعني

الليله الكون منّي غاسل يدّه
ما فيه شيٍ بوجه الارض ياسعني
مليت من صمتي القتال من مدّه
محتاج للي قبل ما اقول يسمعني
يارب والضيق فيني (...) جدّه
مع طلعة انفاسي من الصدر يوجعني
ارميه خلفي وباب الواقع آسدّه
والقاه في واقعٍ مشؤوم يتبعني
وذنوبي بذاكرة الايام ممتده
زرعتها بالجَهل واليوم تزرعني
كم من حبيبٍ طبعت اسمي على خده
في عتمة الليل والاوهام تمنعني
وكم كف مني خذا في شدته مَده
يوم انقضت حاجته لوّح ودعني
جريت صوتي وصمت العالم يرده
ماكن لي صاحبٍ في كربتي معني
سلمت في معركة تاريخي العده
وايقنت ما غيرك بشكواي ينفعني
الوقت ندي وانا من قوّتك ندّه
اقنعته بوقفتي وبعدله اقنعني
ربي دعيتك ونار الياس مشتدّه
انزل لك بدمعتي والارض ترفعني
يالله عسى دعوتي ما هيب مرتدّه
ولا ملايكْتك من حماك تردعني
ميزان الاعمال لو بيعادل الكدّه
يا حسرتي كان ما قدٌمت ضيعني
لكن رجاي بكرمْك اكبر من الشدّه
وانت اكرم اللي قبل ما اقول يسمعني