مرحوم يا مير بقا عالي الشأن

جانا خبر يحمل مقاديم الاحزان
هز العروبة والجزيرة واهلها
يقول نايف مات والهم عنوان
روح زكية حان موعد اجلها
الموت حق وصعب يرحم له انسان
والعين من موته تزايد وبلها
واهتز فكري والحزن داخلي بان
احزان جتنا والصدر ما احتملها
والقاف جمّع له حروفٍ علي شان
تكتب قوافي حزنها في جملها
فيها معاني كنها ثور بركان
توصف همومٍ نبض قلبي حملها
على أميرٍ عاش رمزٍ للاوطان
رمز الشجاعة والتواضع شملها
افعال طيبه كلها بر واحسان
عاش الفخامة فوق قمة جبلها
سقم العداء في كل موقف وميدان
قاطع لسان الشر.. محرق عللها
يبكيه كل الشعب بدوٍ وحضران
وتبكي جبالٍ شامخه مع سهلها
ويبكيه مزنٍ كل ما هل هتان
والدار تبكي والقرى مع نخلها
مرحوم يا مير بقا عالي الشان
حرٍ كريمٍ كل عليا وصلها
ياجعل روحه لابعث تسكن اجنان
في عالي الفردوس روحه نزلها
محمد مرزوق السميري - الرياض