راح وترك للوطن والشعب ذكر ٍ مجيد

شعراء الوطن يعبرون عن حزنهم بفقد نايف الأمن

الموت حاصل وكل إنسان لازم يبيد
. . . لكن الاحزان تطغى بالقلوب وتزود
لامن فقدت الوفاء والعز وأجزل رصيد
. . . اللي على الدار وأهله ما لخيره حدود
تشوف فعله تعرف إن نظرته للبعيد
. . . باذل على خدمة الإسلام كل الجهود
يتعب ويشقى لاجل مرضاة رب العبيد
. . . أي شي يجرح كيان الدين ماله وجود
الصارم الحازم الجازم ضديد الحديد
. . . الليّن اللي على من تاب سمح وودود
الحق يبكي عليه وكل أمرٍ رشيد
. . . ينعى رحيله ووجه الجود حزنه يسود
تحس صدر الوطن ضايق وحزنه شديد
. . شف دمعة الأمن طاحت من عيون الجنود
مامات نايف ولو إنه توفى أكيد
. . . على طريقه أسود ٍ عن حمانا تذود
عيال عبدالعزيز اللي عطاهم مديد
. . . خدام مكة وطيبة لين يوم اللحود
الله يرحمك ياللي كنت متن وعضيد
. . . للي جفوه القرايب والزمن والجحود
هادي حليم وحكيم القول ،رايه سديد
. . . أمين وافي وصادق بالوعد والعهود
راح وترك للوطن والشعب ذكرٍ مجيد
. . . معالم العز وآثار المناقب شهود
فيصل بن سبيّل الباهلي