صوت الصورة

شريت لي سخّان من حرّ مالي
أبي أحس أني بشر لا تروشت
تعال يا مهندس وحطه عدالي
ثم صب لي من دفوت الما ملي طشت
البرد في صدري غداله مجالي
تلعب هبوبه في ضلوعي مع البشت
يوسف بن علي البديري – المجمعة
الجو بارد وأنت تحتاج سخّان
ويومك شريته أفهم العلم مني
ركب على المضبوط لا تصير بلشان
مصدر خطر لاصرت منته بفني
سلطان سعد السهلي - المجمعة
البرد جانا والدفا هو هدفنا
وكلٍ على استعداد يبذل مساعيه
والصحه اللي دايمٍ هي سعدنا
هذا الشتاء ما يلزمه دوم نشريه
محمد عبد العزيز الخنيفر – أشيقر
البرد جانا وجبت للبيت سخّان
وعزمْت أنفذ شغلته في يديني
ما نيب لاجاهل .. ولا نيب كسلان
ولي الفخر في خدمة الوالديني
فهد بن عقيل الطويان - بريدة
شريت لي سخان والسعر عالي
وأبوي وصاني أوديه للبيت
والمشكله سباكنا دوم غالي
معروف اسمه عندنا ذايع الصيت
حمد عبدالله الوايلي - حوطة سدير
في كل فصلٍ سعلةٍ تزدهر فيّه
يكثر لها الطّلاب والسعر يغلى
كلٍ يدور بالشتا ما يدفيّه
من ملبس .. وناراً .. وسخان للما
ناصر بن جمعان آل عوض
وادي الدواسر
هبت شمالٍ من مناطق بعيده
وكلٍ على ما قيل لحافه يكفيه
يا محتضن سخانةٍ له جديده
كوده إليا غسّل من المي تدفيه
كانك تبي تحيا حياةٍ سعيده
لبس الفرو والصوف والقطن بديه
سعد الحمّاد - روضة سدير
ما مشكله مشترى السخان
المشكله من يركبها
قلّ العماله وزود أثمان
أسعار .. الله يزينها
محمد فهد الجلعود – سميراء
حملك ثقيلٍ وأنت ما نته بقاويه
سخانكم يا رجل سخّان تقليد
عليك بالجوده ترى الزين شاريه
وأنصحك تشري من وكيلٍ بتعميد
عبدالمحسن بن محمد المحيسن
رياض الخبراء
لجل الشتا أحضر السخّان
ودفايةٍ لكهرباء بالدار
وكان له حزّة الشيبان
عباه مع شبة النار
سعود عائش الحربي
يا شاري السخان عجّل على البيت
سخانتك ركّب وزوّد حراره
البرد قاسي والشتا جا بتوقيت
يا حظ منجاب الحطب شب ناره
خالد بن ناصر المخيمر – روضة سدير
عجل علينا حيث متنا من البرد
الجو بارد صار مثل الجليدي
راع أرجوك لا.. لا.. تردد
حضّر لنا السخّان مويه جديدي
عبدالله بن صالح البشري
الله يعينك يا فتى شايل الحمل
ثقله عسيراً بس نفعه لنا عم
وطهورنا دافي غدا بالفعل سهل
من بعد ما هو بارداً يكسر العظم
نايف بن عبدالعزيز اليوسف
يا شاري السخّان مبروك .. مبروك
حل الشتا والبرد هاجم وقاسي
وراعي السباكه ذا اليوم ما هوب متروك
لازم يركّب لكب زود الحماسي
بشائر القحطاني – الرياض
صورة العدد بعث بها للزاوية القارئ محمد البعاج
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة