يوم الأضحى عيدي كنّه عيد غير!!!

ايه غادر بعد ما حلّ الصباح
يوم الاضحى عيدي كنّه عيد غير
في تمام التاسعه هنّى وراح
كل عيدٍ والفرح فيني غدير
ثم وقف،وابتسم،قال بمزاح
لو اسافر عن عيونك وش يصير؟
كنت ابادل بسمته حب مُباح
كنت احس انّه بيرحل..او يطير
مرّ عيدي والفرح عيّا يُلاح
مرّ عيده غايب عنّي كثير
كنت افتش عن شعوري ،عن وشاح
عن حكايا والمرايا تستجير
قلت وينه؟والحزن فيني مُتاح
هو بيرجع؟ صحّ يمّه؟ هوبخير؟
كنت اعانق بعض اثار الجراح
في يديني،في وصوفي بالكثير
صرت ألملم أي بقايا ماتُزاح
في الاماكن والمساكن والأثير
صرت اتمتم ليه يرحل؟ ليه فاح
البعاد اللي سكن عين الكسير؟
إيه يمّه رتبي جو الصباح
بهرجي أشياء ذاك المستنير
قال اسافر واللقا بعد الرواح
قال برجع بالهدايا والحرير
اذكر انّه خبّى ظلّه باتضاح
تحت منفى بين نار وزمهرير
واذكر انّه ضاع صوتي واستباح
المساء اللي تدثّر بالضرير
شفت طيفه بالسماء وهج وسماح
مدّ فيني من تعابيره عبير
كان جالس بس يضحك بانشراح
بس ساكت والدفا جاع بضمير
صرت أنثر ، ثم أنزف من رماح
في ضلوعي كل شي مستطير
قلت عطني من وصوفك هالفلاح
قلت تكفى لاتخليني وتطير
الله اكبر بعد ما قلبي استراح
يرسم بدربه تجاعيد المصير!!
ايه غادر بعد ما حلّ الصباح
يوم الاضحى عيدي كنّه عيد غير!!!
سارة العتيق