يانفس صبرك

خلاص ياوقت الشقا والبهاذيل
مليت من دنيا طويل مداها
من أول راجيه وأبغا المحاصيل
واليوم يسقينى من مر ماها
يانفس صبرك واستقيمي على الحيل
مالك سوى صبرك يخفف عناها
وشومى عن العذال نقالة القيل
ناس بسوء اخلاق تطرد شقاها
وياعين ياللى تنثرين الهماليل
هلي فراق اللي عهوده نساها
لى صاحب ماعادمنه مراسيل
مدري تغلا او جايز من هواها
عشنا الهوى لذات حب ومواصيل
وطاري الفراق اليوم ظلّم سماها
ياطير عطني من عشيرى تفاصيل
وين الديار اللي برجله وطاها
قل له عن جروح بقلبي مغاليل
حارت على أهل الطب تلقى دواها
وقل له بجوفي مرهفات المصاقيل
والعين تنثر بعد فرقاه ماها
خذني معك بالله ياساري الليل
حتى ولو تمسي بقفر خلاها