إلى شفت الربيع اكحل عيوني

إلى سال المطر في كل وادي
وعم الحاظره هم والبوادي
أبي معناً قوي ماهوب عادي
يناسب ذايقة كل البريه
أبا اخذ لي حدود أسبوع إجازه
ولالي غير شوف البر عازه
واشغّل موتراً زاد امتيازه
مجمرك عقب لوحات اقطريه
واباخذ عزبتي واخذ فراشي
واباخذ خيمتي والا بلاشي
ومع حزّة طلوع النور ماشي
ابي الصمان وفياضٍ خليه
إلى شفت الربيع اكحل عيوني
وابا اغنّي وابا اهيّض شجوني
يزول الهم في شوف المزوني
واحس اني خذيت اكبر هديه
أنزل دلّتي واشبّ ضوي
ومن عقب العذاب ايزين جوّي
واضبّط كل اموري بالتروي
بلا زحمه .. ولا روحه .. وجيه
إلى شفت الخزامى والشمطري
عليّ أجمل زمانٍ فات يطري
بكل الناس طبع الحب فطري
وأنا لي ذكرياتٍ عاطفيه
وأشوف الذود واعشق فيه بكره
وعشقي موت له رهبه وسكره
وأنا مثل العباد أحب واكره
ألا يا بكرتي وش بك عليه
أنا فكّرت ماطب المدينه
وقلبي بالغلا بيّح كنينه
عسى الله وسط زحمتها يعينه
وعسى الله يرحم الروح الشقيه
!!Article.footers.caption!!