من يفرح وهو ماشاف يوم العيد خلانه

نهار العيد ماعدّه نهار العيد لين اتجين
واكحل بك عيونن ماغفت بالليل سهرانه
احب العيد بوجودك والى غبتي تروح اسنين
تمر اعيادها قدام عيني مالها خانه
انا في غيبتك ضايع وكل الناس مبسوطين
ومن يفرح وهو ماشاف يوم العيد خلانه
عسى يومي قبل يومك وقولي ياهواي امين
وعساي القاك قدامي نهار العيد طربانه
الى شفتك مشى قلبي قبل لا امشي ولاتمشين
يطير اطيار شيهانن كفخ بالجو جنحانه
احبك قبل ماشوفك واحبك قبل ماتدرين
محبه يعجز الشاعر يترجمها بقيفانه
احبك ياهوى بالي محبه بالقسا واللين
وقلبي من كثر حبك فتح لك كل بيبانه
سواد الليل بعيونك ولاتحتاج للتزيين
بدون الكحل مكحوله وجذابه وفتانه
وصوفك تعجب اعيوني وتبهرني وانا مسكين
عجزت اعدها بالشعر بالحانه وباوزانه
خلقك الله مثال الزين ماوصلو لك الحلوين
تفردتي بكل الحسن باشكاله وبالوانه
والى من قيل مغروره فهو لك حق تنغرين
وانا ولهان وادري بك علي با لعيد ولهانه
ابا اسهر لك بليل العيد افكر فيك لين اتجين
واكحل بك عيونن ماغفت بالليل سهرانه
أحمد السكران