يوم الوطن والمجد السعودي

يوم الوطن يا حي يومه وذاكره
نعتز به وانطول في كل عامي
يوم بنى مجدٍ ثبت ساس مبناه
مجدٍ اشمٍ فوق الأفلاك سامي
بناه أبو تركي على العز وارساه
واوسع حدوده وامنه بالحسامي
ما حدٍ طمع من هيبة الليث با حماه
يذل من سيف يقص العظامي
سيف صنع مخصوص واهدي ليمناه
يستاهله عبدالعزيز العصامي
أمن به احدود الوطن طاب مسعاه
وخلا الجزيره في الأمان التمامي
حتى جعل ذيب الخلا صاحب الشاه
كلٍ بامانٍ سايرٍ ما يضامي
الشمل لمه واسعده عقب ما تاه
واغناه عقب الفقر عدل الامامي
وارفع عمود الدين والشرع مشاه
بعد اندثاره واختلاف وخصامي
وحد بمثل اليوم وطنٍ وسماه
باسم نفاخر به جميع الأنامي
بالمملكه رفرف علمها وعلاه
حتى رقت بالمجد فوق السنامي
صارت بفضل الله وصادق نواياه
يضرب بها في العدل وايضا السلامي
فاختاره الله يوم خلف لها الجاه
جاه الفخر والعز وارفع وسامي
متجدد بالمجد في كل معناه
هذا الصحيح ولا يكذب كلامي
فضل الملك لول وصادق وصاياه
يمشي بها اللي حاضر باهتمامي
هذا ويبقى الملك والحكم لله
ثم لبو متعب عزنا والسلامي
وعضيده ابو خالدٍ لا عدمناه
ونايف بجنبه بالمهمات قامي
عبدالله بن حمير آل سابر الدوسري