ضيقة البال

الضيقه اللي تلوف الصدر وظلوعه
في تالي الليل يوم الناس هجاعي
مستوطنه في عروق القلب وتلوعه
دقات نبضه تزايد بين الاضلاعي
من قوها من ورى الاضلاع مسموعه
والنبض لازادبه زادن الاوجاعي
سبت زمان ما بين الحسد وطموعه
دنيا عجيبه وفيها الكل طماعي
سهوم بقعا تداهمنا ومجموعه
دارت رحاها تمزعنا تمزاعي
والطيب اللي يخاف الله على طوعه
ياصل قريب الرحم ماهوب قطاعي
يكرم ضيوفه ولو يبقى على جوعه
لاهل الكرم والمراجل رجل فزاعي
يزين بعيون كل الناس وربوعه
ما بين ربعه سنافي دمث الاطباعي
كل الخصال الحميده فيه مزروعه
يجني ثمرها وفيها الربح ماضاعي
ولا الردي فالعرب يا مقشر اطبوعه
لاهل النماميم وهرج الشين سماعي
ضحكات سنه مع العربان مصنوعه
يمشي بوجهين يضحك لابس اقناعي
كل الصفات الحسينه منه منزوعه
اكثر هروجه رديه مالها داعي
هذا الزمن صعب لامن ذبلت اشموعه
والوقت كايد علينا صار خداعي
الله خلق هالبشر تابع ومتبوعه
سبحانه اللي خلق اشكال وانواعي
والناس ماهي مع الايام مقنوعه
تمشي على فالها والكل مطواعي