ثورة الدمعة

الدمعة اللي هزت اركان الاهداب
باقي لها ذكرى تجوب المحاني
صارت توزع في عروقي وتنساب
احلام ووهام وهجوس ومعاني
كل ماسرح فكري وعن طيفها غاب
تعود في لحظه تزلزل كياني
تقول تهجرني بلا ذنب واسباب
واتضيع آمال العمر والاماني
وانا الذي من شانك ابعدت الاقراب
واخترت حبك كل شي بزماني
كانت عطور اشواقك اتجيني اسراب
تحمل شجون انغام صوت الاغاني
واسري بنظراتك الى حد الاسهاب
مع الخيال وبين قاصي وداني
واليوم ضاع الحلم مابين الاصحاب
واصبح فؤادي من جحودك يعاني
تبي تاكد قلبي اشلون منصاب
جرب دقيقه حط نفسك مكاني