غياب آخر

ماعاد ينبت قصيد وماتت اعشاب=والقلب ماعاد تاسعه المحاني
يغيب هذا الفضا وتسكر ابواب=والصمت يتبعني بصمت واعاني
من غبت عني وكل الناس غيّاب=بعدك ولافيهم الي مانساني
بعدك وانا مابقى لي حي ماغاب =ولابقى حرف ينطق به لساني
من غبت كل البلد بعيوني تراب=احجار لو كان سموها مباني
من غبت والقلب يركض لك ولاشاب =يضوي لك اقمار واحلام واماني
من علمك تقفل الدنيا ورى الباب=ماغير طيفك غرسته في مكاني
كنك تسمرت واقف بين الاهداب=طيفك معي لاتجاهاتك خذاني
دورت لك في خبايا ربع واصحاب=في بحة الناي في حزن الاغاني
في ضحكة امي وفي همسات الاقراب=في كل حزن الصحاري والمواني
طيرت لك من حمايم روحي اسراب=حطن ولافيهن الي مابكاني
لك سيرة الغيم والصحرا لك كتاب=لك سحر يملا الوجود احساس ثاني
كل المداين لشوفك ترخي ارقاب=ودروبها كلها تبكي عشاني
ياغايب ارجع ..جفوني ربع واحباب=والشعر مل الكتابه والمعاني
ماعاد باقي بقلبي نبض ماذاب =لله در انتظارك والثواني
لله در الغلا لو ينبت اعشاب =يمديك تعشب وتزهر بالمحاني