من فرحتك بالضيف كنك تحتريه

هذه القصيدة رثاء في الفقيد عبدالرحمن بن خلف التيماوي - رحمه الله -
يا الله بامانك من قضى غيب السنين
ما يأمن الدنيا من الناس النبيه
اليوم والله العظيم اني حزين
حزن الولد على موادع غالييه
من سكنوك القبر يا ذرب اليمين
لا هنت يا كل المراجل يالنزيه
الا رحمك الله رب العالمين
رحمة عظيمٍ لا تعد ولا تنيه
يابو خلف وش عاد ابذكر بك منين
من فرحتك بالضيف كنك تحتريه
والا إلى من استعانك مستعين
تجيه كنك واحد من والديه
والا لحق الجار ما انت بمستهين
بكت عليك عيونهم من غبت ليه
لانك عزاهم من يسار ومن يمين
ما فيه جار ما يبيك وما تبيه
عسى مكانك يا رفيق الغانمين
مع النبي المصطفى وصاحبيه
يكفيك من دنياك طهر الغايتين
غاية رضا ربك وصبر تحتويه
يا رب أجب دعوات جمع المسلمين
واغفر ذنوبه واسبغ الرحمة عليه
حاتم الشمري