صوره تعيد الماضي والحنين ماراح رغم التطور والتقنيه وزود الملذاتي

يامصور الموروث حققت غايات
منها القديمي يلبسوه الرجاجيل
و انواع فضه يلبسوه الفتايات
يا مرحبا ترحيبة البدو بالسيل
نرفع لمن صور بيارق و رايات
و الله يجعل كُل دربه تساهيل
محمد عبدالله الشهري - جبل اثرب
هذا ترى الصندوق للناس معروف
فيه الذهب يعطى العروس ومهرها
لازم يجيبونه وهي لازم تشوف
في زفة الحرمه وكل(ن) حضرها
وصندوقها الثروه تحفظه بلاخوف
ويسر خاطرها ويسعد نظرها
سليمان بن عبدالعزيز السنيدي
صندوق يشرح عن امكانيّة الماضي،
لازم نشوفه على شان نْتفكّر به.
فيه المعاضد ورشرش، ليتني فاضي،
واشوف تاريخ دهن الرأس وانظر به.
كلٍّ حسَب قدرته مستانس وْراضي،
ما هو بحرصٍ على زودٍ يفاخر به.
على يمين الشنيطة بعض الاغراضي،
اللي بوقتٍ مضى توجد وتذكر به.
كانت بكفّ المزارع سيفه الماضي،
وإن كان له ملك في الديرة يشجّر به.
محمد مقحم المقحم - الرياض.
سنين راحت كلها جهد وكفاح
قفت ولا بقى منها الا الذكرياتي
ويلي عليها مابها حي مرتاح
راحت بهم بين الفقر والشتاتي
حياة بسيطه والادوات من الالواح
وشنطه صغيره فيها اغراض البناتي
صوره تعيد الماضي والحنين ماراح
رغم التطور والتقنيه وزود الملذاتي
خالد بن ناصر المخيمر .روضة سدير
شوف التراث الي منول له امجاد
صندوق له ذكرى تبع ناس غالين
وامجادهم راحت مع وقت الأجداد
كم جالهم من صيت واليوم ماشين
صندوق بنت باذل الجهد والزاد
اشياء ثمينه عاشت سنين وسنين
فيه الذهب يلمع مع الوقت ماباد
وباقي التراث موضح شوفة العين
وش قيمته في وقت ماضي ساد
غالي عليهم يدفعون الثمن دين
حمد عبدالله الوايلي
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد