ياما حلاة العيد في ماضيٍ راح لاجا التحلوى دايم الطفل مسرور

العيد في كل وقتٍ هو العيد
إظهار فرحتك مِعْ وصلك للأحباب
ويا زين عيدٍ بأهلِه فات يا عيد
بساطته.. ملبسه.. عادات وآداب
شوف الأهل والقرايب حزّة العيد
وحلواك يا عيد هِيَّه راس الاكساب
وِانْ بِه تعذَّر مِصَافح إيد في إيد
باق التواصل متاح ولا بِه اِعتاب
يالله علينا تديم الأمن وتعيد
عيدك وكل الذي نشكيه قد ذاب
سعود عائش الحربي - جدة
ياما حلاة العيد في ماضيٍ راح
لاجا التحلوى دايم الطفل مسرور
وجتنا كرونا ولا به اليوم مرتاح
العيد وسط الدار غصبٍ ومعذور
ومن هالمرض خلا التجمّع والأفراح
وشفنا علاجه وافر ولا به قصور
محمد عبدالعزيز الخنيفر - أشيقر
العيد له بقلوب الأطفال تذكار
لا جاء نهار العيد لبسوا جديده
بعيونهم فرحه ما تقدر بمليار
بالصوره اللي وضحتها الجريده
اللبس زاهي والجدايل لها أسرار
ونفوسهم بشوف الحوايم سعيده
خالد ناصر المخيمر - روضة سدير
سلام منّي يالثلاث الفتايات
يا لابسين من التراث القديمي
الله يحفظكم بناتٍ عفيفات
في دار عز ابن السعود الكريمي
وتراثنا محفوظ بيدي حصيفات
مثل الذي قالوا قديمي نديمي
محمد عبدالله الشهري - جبل اثرب
لبسً من الماروث غايب له سنين
من نص قرن كانت الناس تشريه
وقت البساطه قبل حل الفساتين
ضافي عليهن واصل حد كعبيه
مخيوط بالإبره روز بتفانين
موضه زمان فات محداً بناسيه
سعود بن عبدالعزيز الهزاع - نعام
شوفوا السعاده بيّنه عند الأطفال
واللي يحلويهم به الطيب معروف
بأعيادنا حب التكاتف هو أمثال
وأيضا التواضع للطفل دوم موصوف
وأطفالنا من الفرح روح وإقبال
ومن السعاده تمشي صفوف وصفوف
ريان محمد الخنيفر
للعيد فرحه دايمٍ وقت الأعياد
وله في قلوب الناس ودٍّ وقيمه
وأهل الشّعر دايم يقولون الأنشاد
لا من ذكر كلٍ نديمٍ .. نديمه
سطام المسردي - الرياض
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد (عدسة - إبراهيم الجبر)