ترى المطر خيرٍ وتحدث بلاويه ما احد يلومك عاني تْشوف خرّار

وقتٍ نزل به في البلد زين الامطار
دايم على بالي ولا نا بناسيه
يا زين نقع الما تحت ذيك الاشجار
عساه خيرٍ للحلال بمراعيه
إذا اجتمع سيل وجرى مثل الانهار
تراه يبحث في الفضا عن مجاريه
يا راعي الموتر تحذّر م الاخطار
ترى المطر خيرٍ وتحدث بلاويه
ما احد يلومك عاني تْشوف خرّار
نازل على الوادي وله صوت توحيه
لكن عقبت السور واهملت الانذار
بأنّ الخطر موجود حولك مواريه
خلّك بعيد وطالعه بسّ بانظار
وان اقتربتَ بالقدم شِف مواطيه
محمد مقحم المقحم- الرياض
فروع سيلٍ فيِّضت مِن صِياهِد
واتلاه صَب اِبْمِنحدر تِقِل شَلَّال
وروعة طبيعه بالوطن له شِواهد
بشرقٍ وغربٍ مِع جنوب او شمال
وسِج القدم بتلالها والجَرَاهد
عَن ضِجِيج المدن يطْرب لك البال
سعود عائش الحربي/ جده
عسى ربي يعله من الوابل الشؤبوب
سحاب رزيم ثقيل وفيه السنى لماع
لياحنة رعوده وترادم والمطر مصبوب
تساقى سيله وحول جارف سراع
ومناظرالشلال تسرك والحياء مطلوب
على ديارنجد العذيه والمطر نفاع
سقاها الولي من كل جال وصوب
ديرت هل العوجاء ماداجها الطماع
حمد عبدالله الوايلي .حوطة سدير
منظر طبيعي مع الشلال
والصوره اللي نقلتوها
صوره ربي تحته جبال
مع سيل وانتم لقطتوها
سلم على كف هالرجال
اللي لقطها ونشرتوها
سليمان بن عبدالعزيز السنيدي
منظر طبيعي يشوق العين شلاله
مسيّره ر بنا في الارض ينسابي
الحمد لله ربي ما اسجد الا له
انشا المطر عالجبل والتل وهضابي
البدو يم المراعي ناس رحاله
يم الديار الذي يضهر بها أعشابي
محمد عبدالله الشهري.جبل اثرب
خذو الحذر ياللي على البر ناوين
الله يوردكم دروب السلامه
بعض الفياض فيها الخطر يالمسلمين
دراكيل محفوره ولا عليها علامه
ويلي عليكم ياللي بالبر كشاتين
لافات الفوت ماعاد تفيد الندامه
كم واحد راحت حياته المسيكين
باسباب الجهل او يعتبرها شهامه
خالد بن ناصر المخيمر. روضة سدير
صورة العدد