مشاهد صحاري

كثرت هواجيسي وطير العنا حام
والنوم غادر محجر العين ساري
حاولت ارده واختفى مثل الاوهام
راح بدجى ليلٍ بعث لي طواري
أسمع لها براسي صدى ساحة الغام
واحسها في جوف صدري شباري
وبين الوعي واللا وعي كنها احلام
مرت على بالي مشاهد صحاري
شفت الأمل فيها على ريع قدام
ماشي وانا خلفه اناديه جاري
اقول لحظه لي معك رحلة اعوام
رفيق درب وفيك دايم أماري
رغم ان يفصلنا قدر بدد احلام
ولا فاد بمصافح يديك انتظاري
لكن شوفك مصدر آمان والهام
واشيا كثير تحول دون انكساري
والحين اسمعني بقى مختصر هام
حبل الرجا لا ينقطع بك حذاري
أخاف يتحول حبل ياس واعدام
وتشيل ذنبي يا أمل وانت داري
ما رد لكن لد بعيون منظام
وللحزن في وجهه بداية مواري
واشر بيده غرب يعني كذا ختام
ولا فيه وقت يفيد بعد العصاري
هنا صدح صوت المآذن مع انسام
صبح انبلج انهى خيال الغتاري
وفزيت البي داعي معين الآنام
واذكره وانفث خايفٍ عن يساري
عايض الميلبي