درة بحر

ياطير ياللي ضاريً للمطاريش
تكفا معك ياطير خذلي رساله
حدري جناحك ضمها لي مع الريش
عطها الذي مايوم ننسى وصاله
ليا جيتهم ياطير وقت المغابيش
عطه الجواب وهات منهم بداله
الصاحب اللي ما بخده نقاريش
ومع صغر سنه متزن في دلاله
لاهوب مغرورً ولا وافقه طيش
وافي وعقله منسجم مع جماله
يفدونه اخبول العرب والمراميش
واهل العلوم الهابطه والفشاله
ما سولفوبه بالعلن والوشاويش
محشوم عن هرج الردا والرذاله
درة بحر ما حصلوها الطواويش
صعبة منال القرب منها استحاله
ومن شاف زوله همّش الغير تهميش
صابه ذهول وشذ معها خياله
واصبح كما البهلول مثل الدراويش
وليا تمادا شوي يظهر اهباله
بيني وبينه حال بُعد وتباليش
وحكم الظروف اللي على الله زواله
هذا وكاد الهرج من دون تشويش
بلاي انا من قص قلبي وشاله
محمد بن سوعان الربيّع