العين والمنقار والمخلب إحْداد وجمال شكلٍ مع فعولٍ يزِينِنِّه

يا ملبسين الصقر لبسن على الراس
و تسحبونه عند وقت الهدادي
يمكن يصيد من الحباري مية راس
لانه ولد قرناس ما هو بعادي
هذا العرب عاداتهم ترفع الراس
في وقتنا الحالي كما وقت لجدادي
محمد عبدالله الشهري - جبل أثرب
الحرّ له نظره بديعه ومحبوب
فيه المحبه والغلا والوفاء به
عند العرب يعجبك بالحيل مرغوب
هو مضرب الامثال وكلٍ يحبه
لامن نخيته جاب ماكان مطلوب
ولامن هديته كل موقع يعبه
محمد عبدالعزيز الخنيفر - أشيقر
حرٍّ أصيل صاده اليوم طاروح
فرخ يضر واضح في رسومه
يا فرخ شيهان تحد النظر بوح
ودك تطير وتأخذ الجو حومه
وياللي تلبس برقع الطير ملوح
بلاك من ناس تبيعه بسومه
الطير ماله غير قناص مصلوح
يولفه بالصيد وتقوى عزومه
حمد عبدالله الوايلي - حوطة سدير
راع القنص لازم يحافظ على الطير
يلبسه برقع .. ويرعى ظروفه
يرجى من الله يحصد الفوز والخير
على أمور عاليات وصوفه
وإلى نويتوا بالسلامة محادير
خير الرفاقة بالنشاما نشوفه
علي الرشيد - رياض الخبراء
ابشر بعزك كان في المنطقه صيد
لا تشيل هم وسيد الجو واياك
محبوس قيضه سته شهور وتزيد
متلهف لصيد وللخرب فتاك
مخالبه تشبه سلاح البواريد
يذكي الفريسه لشرايين سفاك
راع الصقر لجل الولع يقطع البيد
لقطع المسافه في المسير يتحداك
سعود عبدالعزيز الهزاع - نعام
الطير صقَّاره قشع برقعه عنِّه
ولا مِن طيره بافضل الصيد له عاد
يزين مجلاسه وفنجال بِنِّه
الحرّ له تقدير من عهد الاجداد
والخلف عزوه وطوروا بفنِّه
العين والمنقار والمخلب إحْداد
وجمال شكلٍ مع فعولٍ يزِينِنِّه
سعود عائش الحربي - جدة
‫‬‬
يا صقر يا فخرنا بين الطيور
انا اشهد انك حرّ وبك نفتخر
في نظرتك عز وتجيب السرور
لك موقعٍ بالقلب يابعيد النظر
في صيدتك عزّ دايم مع حضور
لاشفت صيده تنطلق شبه الشرر
ريان محمد الخنيفر
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد (عدسة/ ظافر الشهري)