بين السماء والأرض يفرد جناحه يفرح به القناص مع شقة النور

يا زين هالصوره مع الصقر لا صاد
ثم أفرد الجنحان واومى براسه
يومي على صيده بليا ترداد
ومدربه راعيه صيد .. وفراسه
عادات أهل الصيد من عصر الاجداد
فيها من المتعه .. وفيها الوناسه
سليمان عبدالعزيز السنيدي - الرياض
الارض جدباء والصقر لاقيٍ صيد
يذكي فريسه صابها ضعف وهزال
الصيد قلّ .. وقلصوه البواريد
معاد به طيرٍ على الارض يجتال
وعن حاجته يرمي على الصيد ويزيد
ليا صاد طيرٍ يرفع الراس مختال
من اولٍ سرب الحبارى ملابيد
خمسه وتسعينٍ بها انواع وأشكال
سعود عبدالعزيز الهزاع - نعام
الطير يوم إنه تمكن من الطير
مسك بمخلابٍ وينتف بمنقار
بدبرة المولى تيسّر له الخير
كل الامور يديرها وال الأقدار
الرزق مضمون ولا ياخذه غير
الله يوفقنا لتخفيف الأوزار
علي الرشيد - رياض الخبراء
هذا الفخر ان كان تبغي الصراحه
لا صار عندك طير بالفعل مخبور
بين السماء والارض يفرد جناحه
يفرح به القناص مع شقة النور
لا شاف له صيده يزيد انشراحه
يومي عليها بقبضةٍ كلها جور
مخالبه للصيد اكبر سلاحه
من يقربه يا ناس بالحيل مخطور
خالد ناصر المخيمر - روضة سدير
سبحان من هو سخر الطير للطير
هو منزل الرحمه وعينه بصيره
صقرٍ يغذي هيثمه عنده الخير
صايد فريسه في ظروفٍ عسيره
ياطير لك وكرٍ على الضلع وينير
والارض ماهي لك منازل قريره
وقتٍ تغير صار فيه الصقر غير
مخلف زمانه يوم هذا مسيره
حمد عبدالله الوايلي - حوطة سدير
سيد الجوارح دايم يصيد .. ويفيد
من حد مناقرٍ .. ومخلب يروعك
ياطير لاتقضي على الصيد وتزيد
العش فيه أفراخ وأنته وجوعك
يا صقر ياللي دايم تهد .. وتصيد
كلٍ حرص يقنا نوادير نوعك
سعود عائش الحربي - جدة
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.