عساك بخير

ياعساك بخير.. يا وردة سنيني
ياعسى ماغبت من فكرك وبالك
إن نسيتي «الفرح» شكله نسيني
وإن تغليتي.. أنا كلي.. فدا لك
بيدك الخافق.. إذا ما تذكريني
كان ماهو في يمينك.. في شمالك
بي فضول.. وضاق ليت تعلميني
يوم شفتي لي «رساله» وش طرى لك
قبل لا ابدا في كلامي طمنيني
عنك ياللي متعبتني.. كيف حالك؟!
صاحبك من زود عشقه صدقيني
والله إنه يرتجف.. لاجا.. مجالك
من رحلتي،، والغلا جرحه دفيني
في خفوق من غيابك عاش هالك
وعد مني.. دام مسكانك بعيني
لو يطول الصد،، ما ادور،، بدالك
بس لك «كلمه» على الدايم تجيني
يوم قلتي «ناكر» ووقتي.. غدا لك
ليه ناكر؟؟ إن قدرتي جاوبيني!!
ياخساره.. كيف هالشي.. بخيالك؟!
وإيه فاكر.. قبل لا انت تسأليني
مو حقاره؟! بس فاهم وش سؤالك!!
وإيه ذاكر.. كلمة،، بينك وبيني
والأماره،، كلمتك،، وقت ارتحالك
ليلة.. قلتي لي إنك.. ماتبيني
والسبب.. والله مدري.. وش جرالك
بعد هذا،، طالبك.. لاتتركيني
واذكريني.. كل ماغطاك شالك
وإن نسيتي.. مابقي شي.. فيديني
العزا.. لاحساس قلبي.. والبقا لك؟!
محمد مدان الشراري