عاد عيدك خفوقٍ من ضلوعي خذيته

عاد عيدك بخير وعاد عيدك سعاده
يا سعادة خفوقٍ ما نساك ونسيته
في نحاياه لك مني محبه واشاده
وين ما رحت تركض به غرامك لقيته
أنت سحر القلوب وما يبي لك شهاده
أجمل العمر يا عمري بقربك قضيته
وأنت عيد العيون وطرفك اللي سهاده
نوّر القلب من نور الغلا واهتديته
جامع الملح بلحالك وسكّر زياده
علّم البعد حمل الشوق أنا ما قويته
آتحرى وكنّي مغترب عن بلاده
كل ما ضاق صدره قال ليته وليته
لقطة الصبر مدري وش تفيد الإعاده
أصلاً الصبر يا كم من سنيني عطيته
ايه لو كل من ودّه يحقق مراده
كان الانسان يلقى حاجته وسط بيته
يا جميلٍ فقدته ما فقدت العباده
الله اللي طلبته في لقاك ورجيته
من بعادك عسى قلبك ما يلقى بعاده
ذكّره واعلم إني كان ما جيت جيته
عذرا العيد عاود وأنت عادتك عاده
سلط الله على ليل الوله كم سريته
أجذب الوجد وانزل بين صبر وجلاده
الله إنه يعز الهاقي اللي هقيته
فارسٍ ما كبا لو كان كبوت جواده
حوّلت به على تكوين حيه وميته
عاد عيدك سوار وعاد عيدك قلاده
وعاد عيدك خفوقٍ من ضلوعي خذيته!
مشخص السلمي