ارم الدفاتر والشريحة بالأرقام

أرمي الدفاتر والشريحة بالأرقام
يا الله عس عرف الردي ما يعيدي
ولا تلتفت للخلف انظر لقدام
لعل تشرق شمسي يوم جديدي
واطلب رفيع العرش جلاي الاظلام
بالك تحرى عون مد العبيدي
رب خلق خلقه وميز بالاقسام
حكمه ولامد الايدين الزهيدي
ولا تصحب الا طير حوران حطام
حر على كسب الغنايم معيدي
شهم على المأجوب عجل وهمهام
صدره على حفظ السراير سديدي
ولا رفيق طيب العزم جزام
لو قيل في بعض المواقف عنيدي
لا هود الميقاد يشعله بشعام
حاضر حصيل وما تبقى رصيدي
واليا رزقك الله بفلاج الاخصام
لعل لعمره في الليالي مديدي
وافي على فعل المواجيب مقدام
خطوة على خطو النشامى يزيدي
من شجرة مهيب رجس ولا ازلام
في الدين بالغ والتعامل حميدي
معرب منسب خواله والاعمام
من ماكر يوم التناسب مجيدي
درع عن الصكات ياقيك وحزام
وان كادلك غدر المعادي يكيدي
ريف على ربعه كما الغيث دمام
بأمر الولي يحي الهشيم الهميدي
يفرض وقاره من حجاجه للابهام
ما ينعرف للطيب فيه تحديدي
وانحطك الله بين خدش ولوام
درب السعة دامك عزيزاً شديدي
احذر تصاف الخبل لو الدهر ضام
ما احد ورى رفق الردي يستفيدي
دلخ ليا منه ثنى الرجل ما قام
ويرمي شماغه عند قدر العصيدي
شفق على الضولات بالقول طهام
ويجر هرجه مثل هرج البليدي
ولا رفيق بين الاصحاب نمام
ينشر علومه مثل ساع البريدي
في مهنته حطم مقاييس الارقام
من خلقته ماجاب علماً وكيدي
دنيا تغير بالليالي والايام
مدري بعدها ويش ربي يريدي
صادت تنافس بالدعاية والاوهام
مثل متوكي فوق خضر الجريدي
ورجل على الماجوب مهوب دوام
وش عادل لو انه يعد القصيدي
لو يستعين بدف وطبول وانغام
مما يزيد الامر فيه تعقيدي
الشعر اله مضمون واوزان واسهام
ولا عنه عكف الشوارب تحيدي
موروث فن ولا يعرض للاعدام
ينبض به الشريان قبل الوريدي
شعر العرب سحب براهيم واحكام
ومن المواقف صيغته تستزيدي
كما شاعر يلهم على بدعه الهام
ومن الصخر ينحت قواف النشيدي
وسوالف فيها عزيزين واحشام
اشهد لهم والله علي الشهيدي