أوقد النار

قم يا محمد واوقد النار يابوك
ثم سولي من طيّب البن فنجال
خلّه على ذوقي رفيعٍ ومحبوك
يلقى به المشتاق للقول مدخال
واليا تكيّف مخ راسي جب البوك
بكتب قصيدٍ في تماثيله اجزال
مصيوغةٍ صوغ الذهب مابه ركوك
تسمى معانيها ويصلح بها الحال
يا سامعٍ قولي تفاصيلها دوك
نصايحٍ يزكي بها كل رجال
الأوله في طاعة الله بدعوك
إجعل لها في داخل النفس مدهال
إغنم حياتك قبل ما هلك ينعوك
لا تاخذك غرات الأيام باهمال
أقم صلاتك والذكر ينطقه فوك
وأد الزكاة وصومة الشهر باكمال
والبيت حجه لا يجي حج مشكوك
مناسك الحجه على نصح واقبال
اعصم عصمك الله عن كل منهوك
فرضك وعرضك لا يجي فيهن احلال
والثانية شف والدينك يراعوك
يرجون منك الوصل في كل الأحوال
قد أزملوا صغرك وبالحضن شالوك
واسقوك من حلو الثدي در الابهال
تعبت مناكبهم على شان يغذوك
تحملوا جور الزمن واشهب اللال
من كن منهم حي ينخاك وأرجوك
خلّك كما غرسٍ يجي فيّه ظلال
ومن مات منهم حي لا يصير متروك
يا بخت من قَدّم لهم ربع مثقال
والثالثة خلّك على الجار مبروك
خلّك على جارك كما الغيث همّال
واليا حصل له من صواديفها شروك
وقّف معه في بلوته كنك الجال
واحفظ سدوده حفظ كفك من الشوك
لا تبدي اسراره على قايلٍ قال
يفرح بها من ينقل الهرج صعلوك
هيسٍ ولد هيسٍ قديماته حثال
والرابعه خلّك مع الجود مشروك
ما يخلف دروب النشاما شلي فال
إحذر من الصده عن الوجه لا جوك
الواجبه عطها من الجهد والمال
ترى الجمال اجمال لو شفتها بروك
عند اللوازم تنقل احمولها اثقال
والباب دون الضيف لا يكون مصكوك
مما يسره لا تهاون وتختال
قَدّم له الماجوب من قبل يشنوك
علم الردا منقول مع كل رجال
والخامسه عف الكريمه يعفوك
نفس الرجل يعرف بها ذل واجلال
أم شهرت وكل من كان عرفوك
ولا كسبت من الدناءه غثا بال
لا يطمعك مالٍ به الذل مشبوك
رزق الفتى عند الولي ما به جدال
والا ضعيف النفس للهون مملوك
ثوب المعزّه بدله بأسود الشال
فلاح بن صالح السهلي