مع الوقت بصمات الضرر كل يوم تبان

نصيحة محب لكل من يشرب الدخان
قبل لا يدمر رئتيه وشرايينه
يثمن حياته قبل يلعب به الإدمان
قبل لا يوثر بالخلايا نكوتينه
قبل لا يغوص بغبّة الهم والأحزان
وقبل تتسع به دائرة شر تدخينه
وقبل للمضرّة فيه يظهر لها برهان
بعدها طريق العافية وينه .. ووينه
مع الوقت بصمات الضرر كل يوم تبان
على شارب الدخان تظهر براهينه
يشوف التغيّر فيه حتى عمى الألوان
كما الخط تقرأ صفحته من عناوينه
وترى أهم من ما قيل وأشر شيٍ كان
إلى بان فيه اللي يقولون يا شينه
تراه السبب باللي إذا حل بالأبدان
عطيبٍ صوابه ما ينجي مصابينه
صحيح أن بعض الناس لرواحهم عدوان
بعد شفت من يهدي حياته معادينه
يبيع الحياة الغالية بأرخص الأثمان
مثل من تعمّد قتل نفسه بسكينه
أبا أنصح إخواني عنه والمسلمين إخوان
قبل تجتمع نكبات دهر .. ومعاوينه
نصيحة من الأعماق ما هو كلام إلسان
طريق السلامة يا أولي الألباب يا زينه
كما نعلم أنه حرّمه خالق الإنسان
ولو فيه ذرّة خير ما حرّمه دينه
وترى من يكابر بالنهاية هو الخسران
مثل من تسبب في إيديه بعمى عينه