كان بيت الأسبوع الماضي للشاعر فهد الطويان من بريدة حول التعصب الرياضي المنبوذ والذي يقول: صارت رياضتنا تعصب حزازات مانت بمعي تراك صفيت ضدي وكان صدى البيت من الشعراء: شجع بفن وخل عنك الشعارات ثقافة التشجيع عندك وعندي خل الفكر راقي في كل المسارات ولا تقول أنا في الكون ما فيه قدي وترى التنافس زين من دون غلطات والمبدع المبدع كفو للتحدي وتعصبك يجيب شر ونزاعات ويخلق جوٍ معتمٍ ومتردي سلطان سعد السهلي - المجمعة حنا سبقناكم بيوم البطولات وفريقكم عيّا يجيب ويودي رجعنا للماضي سنين ٍ قديمات تذكر بعام الفين يوم التحدي؟! يااهل الرياضه جنبوا للتفاهات ولاكل صوت ٍ لو سمعته يصدي عبدالكريم ابن خزيّم / البكيرية كنَّا قديمًا نجتمع للمباراة ونمارس الألعاب في جوِّ وِدِّي واليوم صارت في الرياضه عداوات كلٍّ لجل خصمه يشَكِّل تحدي من أجلها صارت جروح ومسبات منتب معي تصبح عدُوِّي وضدي وفي لعبة الكوره خصوصًا وبالذات الوضع منهارٍ وصابه تَرَدِّي اللعب ترويحٍ وتفريغ طاقات مافيه داعي للزَّعل والتعدِّي ناصر بن جمعان آل عوض / وادي الدواسر تحولت حال الأقارب عداوات بعض المواقف وصّلت للتعدي المجتمع فكك بحكم المباراة وبعض جفا جاره وبعض يصدي والشيء الأدهى يوم تكتب عبارات اصله سخافه وقصد التحدي ترى الرياضه أسست للعلاقات حيث الجميع اخوان ما احد يشدي علي رشيد الرشيد-رياض الخبراء وقت اتعصب ياجماعه مضى فات وأنتم شباب ولاعليكم تعدي انتم شباب وتحملون الشهادات والعلم نور للمعالي يودى ناسن تغيب اعقولها فالمبارات يالله عساها بسلامه اتعدي حنا نبي نبي يصدر قرارات ماهي على كيفك ودك و ودي سعد صنهات السهلي/الدرعيه ويحصل مع الأخوان دايم عداوات كم بينهم يحصل زعل مع تحدي هذي هي الكورة حب وهوايات وفيها المشاكل وللعداوة تودي لكن ترا الإعلام سبب دعايات لا من غفل ناس يبدأ يشدي ريان محمد الخنيفر /أشيقر ترا الرياضة ود فيها المحبات لكن نشوف نفوس فيها التحدي وبعض النتايج كم تثير الحزازات هذا يشجع ثم الآخر يردي يا ما سمعنا من سببها وفيات والعاقل اللي للمشاكل يهدي محمد عبدالعزيز الخنيفر/أشيقر ترى التعصب داء محتاج وقفات ولا بد للاعلام وقفة تصدي" هذا التعصب من سنين قديمات واليوم هاهو ناضج من يردي" شجع ولا تغضب ولا تعلي اصوات خلك مثالي وشجع اللي تودي" ترى اللعب اخلاق فوز وخسارات واحذر تقول الخصم ماهوب قدي" عثمان ابراهيم الرشيد0 الرياض مدري من الاعلام ولا تفاهات ناس على زود التعصب تعدي اخوه وراحو كلبوهم عداوات وروح الرياضه بين مد وشدي كل يبدي فوق همه شعارات واقول يامسلم ترفق وهدي ابعد عن اللي يسوي مزاجات وخل التهور لاتجي فيه عدي حمد عبدالله الوايلي /حوطة سدير اصل الرياضه ماهو فوز وخسارات الفن ساسه والتنافس تحدي روح الرياضه واضح بالعلامات الذوق مطلوب ترى الذوق مجدي يعطي ثقافه بالرياضه سلامات شر التعصب صار نقص وشدي عبد المحسن المحيسن -رياض الخبراء لي جاء المدرج ممتلي فالمباراة ياجب على الجمهور شويٍ يهدّي ايضا واناشد جمعةٍ فاستراحات لاتنفعل بالمراهنة والتحدي روح الرياضة تندمج بابتسامات مرة بها خسران ومرة تعدي سعود بن عبدالعزيز الهزاع - نعام ترى الرياضه فن وذوق ومهارات وتشجيع للأفضل محبه ودي بغض النظر عن الاسم والشعارات حتى ولو بين النوادي تحدي لها قوانين وآداب ورسالات ماهي على الطرف المنافس تعدي وإلا جماهير خلاف ونزاعات ومبدا إذا منت بمعي فنت ضدي عبداللطيف الحُمَيَّانِي / عنيزة بيت الاسبوع يكتبه اليوم الشاعر ناصر بن جمعان آل عوض من وادي الدواسر حول السرعة وماتسببه من ازهاق للارواح وتلف للممتلكات ويتم للاطفال ونود ان نشكر الشاعر ناصر بن جمعان على طرح هذه المواضيع الهادفة متمنين من الشعراء ان يحذوا حذوه ويقول في بيته : والدي إرجع ترانا في انتظارك سق على مهلك ولا تنسى الحزام نستقبل صدى هذا البيت بأربعة أبيات فقط تدور حول هذا الموضوع ويفضل الإرسال عبر الإيميل: [email protected] أو على الفاكس 4871070/ 011 كما يسرنا مشاركة القراء بموضوع البيت ومن الشعراء بطرح بيت الاسبوع حول اي موضوع ..
