محاورة

مطلق الثبيتي
ياسلام الله على اللي مايخونون الأمانه
يسهرون الليل والعالم من الراحه رقودي
يعدلون ويصدقون ولا يعرفون الخيانه
حاكمٍ شعب الكويت وحاكمٍ الشعب السعودي
صياف الحربي
مرحبا بالمسلم اللي له قوانين وديانه
وأنت جندي لخو مريم والفهد ذخر الفهودي
ياطويل العمر مايصلح شجيع بلا ذهانه
واحدن ماله ذهانه لا يسوق ولا يقودي
مطلق الثبيتي
الحريبي لو لقاله واحدن يقطع لسانه
ماتغزل في بنات الهند سمحات الخدودي
مادرى راشد محارب يوم يسرج في حصانه
كنه الفارس يبا يغزا النصارى واليهودي
صياف الحربي
ياعتيبه قولوا لمطلق يمرح في مكانه
مايدافع عن بنات الهند ياغير الهنودي
خل بن سرحان يقضي حاجته بأول زمانه
الشباب اليا أنهزم ماعاد للمسلم يعودي
مطلق الثبيتي
أعجبك صوت المغني يوم دق الاسطوانه
مار لاترقص عليها وأنت قرد من القرودي
أنت لو أنك صغير ذقت مس الخيزرانه
مار شفتك عود مابك فود جعلك ماتعودي
صياف الحربي
والله اني ل أمسك احلوق العرب كيد ولعانه
والرصاصه من حزامي والشراره من زنودي
وأنت عينك يالثبيتي مثل لون البرتقانه
مثلها هاك السنه صفرا ماتنقص ماتزودي
مطلق الثبيتي
لايغرك واحدن خداع لو أبدى ثمانه
الرماح أطول رموشه والصواريخ النفودي
وأنت حربي من رجالن مايعرفون الرطانه
مار لاترطن ولو حطوك من تحت اللحودي
صياف الحربي
أنت ذيب ولك سنون ولك تحت بطنك بطانه
ماتعشا من كبار الروس يالذيب الرقودي
الحروب أخذوا فلان وسلموه أمه فلانه
اسمع الكلمه ولا تجحد ترى عندي شهودي
مطلق الثبيتي
واحدن قلبك يحبه ماتفق شاني وشانه
والغنيمه دسها تحت العباه أم اللبودي
الثبيتي في مكانه ماتحرك عن مكانه
وأنت نارن طالعن دخانها من كل عودي
صياف الحربي
يصبح الصبح وتبين الشمس وتطير السمانه
وانت طيرن مانبتلك ريش والوقت محدودي