محاورة

صياف الحربي :
ياسلام الله ودار العز مرفوع علمها
عقب شعشع نورها والظلم حال العدل دونه
الثبيتي لو اقول اقسم عيونك ماقسمها
والتفت فيه بنظرة حسد ويطيّر عيونه
مطلق الثبيتي :
يحفظ الله الجزيرة والشجاع اللي حكمها
مثل قصرٍ ثابت السيسان واخوانه حصونه
صاحبي صياف ينهبها وياكلها بدمها
ليتها ماتاصل الحنجور تنشب في سنونه
صياف الحربي :
المطية ماتقاود غير مع رجل خطمها
لو يضيع خطامها من طردها كثرت غبونه
انت اشوفك تفرس الصيدة وتاكل من لحمها
والخوي لاضيع القانون قاموا يشمتونه
مطلق الثبيتي :
المطية خلها في الدرب لا تكتم نسمها
واحترص من غضبة الجمال لا يضربك شونه
كل حية سمها في بطنها سديت فمها
وان لقيت الوعل ابو قرنين اطقه في قرونه
صياف الحربي :
اكثر العربان يلزمها وكنه ما لزمها
ثم راح من الزعل يمشي ويقطع من ردونه
انت مثل العقرب اللي تخلع الناس بوحمها
مار جاها قاريُ شاطر دهنها من دهونه
مطلق الثبيتي :
ماعليه من عجوزك كان ماضوت غنمها
وان زعل صياف جعل اللي وراه يحول دونه
امس يبني عشته في الضلع واليوم يهدمها
والهبايب ما تهبه والطراقي ما يجونه
صياف الحربي
الله انه ينصر السنة ويظلم من ظلمها
والعرب ما يطحنون الحب لين يفتشونه
لو تشوف العشة اللي صاحب الخبرة حزمها
فوق ضلع كل ما طاح المطر تثمر غصونه
مطلق الثبيتي :
الآشارة فآخر الشارع بصدامه صدمها
الونيت اللي قديم وكل يوم يوظبونه
المنايا ياوسيع العرف مايخطي سهمها
مير خلك صالح النية وعمك لا تخونه
صياف الحربي :
القلوب العمي خل الذيب ياكل من شحمها
والونيت اللي يسوقه صاحبه لا تقربونه
ليت بقعاء تلمس الرمضاء وتاكل من قدمها
وانت يابو راس راسك ماتغير عن متونه
مطلق الثبيتي :
العيون اللي تهل دموعها منهو لطمها
لو عرفته كان خليت الجماعة يحبسونه
المطية يوم ريض مشيها محد( ن ) نهمها
لو نهمها كان تاصل مطرح (ن)ماتاصلونه