الأمور الخافية

يا صاحبي لو قلتلي كيف غيّبت
ما يستمع قلب تقي لو عذلته
بعض المشاعر لو توارى ورى الكبت
تلقى جواب الحال لو ما سألته
العمر صحراء والأمل يشبه النبت
وعلى الأمل تعيش لو ما وصلته
لو قلت شعري يا هل الشعر وأسهبت
تبقى الأمور الخافية ما شملته
صبرت في دنياي رحت وتغربت
ذنبٍ تحاشيته وذنب فعلته
أحد تجاهل غيبتي يوم انا غبت
واحد تمناني وانا ما خذلته
جربت في دنياي واخطيت واصبت
عين مبكيها وعين كحلته
ناجح وانا ادري لو تعثرت ما خبت
شيء حصل قدام عيني وقلته
يا صاحبي وان كان في عمري اذنبت
غصب علي بعض المواقف قبلته
اعرف تراني بالخفا نادم وتبت
بس انت لا تنشد عن اللي عملته