لآلئ شعرية

أخطيت في رميّت طموحي ولا صبت
وما جادت الرميه على ما تمناه
أنا غرست الطيب ل أجل أحصد النبت
وبعض النبات يموت لو يندفق ماه
لا تلومني يا راسي الصلب لاشبت
خل البليد يردد.. «اللا مبالاه»
يكفيك لا جات المواقيف ما غبت
ذيبٍ تلاحي ذيب لا هزك.. عواه
ولا صاح صياح الضحى ما تجنبت
عون الضعيف اللي شكا ضيم دنياه
ولو كنت ما من حال فالفزعه أسهبت
شِعرك رساله واسمك ألحاله.. الجاه
ذقت المراره فالحياه وتعذبت
ومن الوفا حديت عمرك على أقصاه
شمعة وفا تضوي على غيرك وذبت
وما يطلب المحتاج عَطيته.. اياه
وانا معك من واعز الخير حاربت
ولطمت خد الحِسد يوم الملاقاه
وكاني انا في رزق غيري تسببت
قوه من الرحمن.. والشكر لله
ومن تجربة الايام شمت وترتبت
والله ليا من حب له عبدٍ.. أغناه
شمت بقصيدي عن هوى نفسي وتبت
لو الفقر ينهش ضلوعي.. ثناياه
ماطحت من قسوة زماني ولاطبت
وماقلت حتى من قسى دنيتي آآه
ومن كثر ماعزز شموخي من الكبت
حتى بقصيدي ما أقول المعاناة ...
ل أني عرفت ضروف بقعا وجربت
أموووت ما مجد قصيد.. المحاباه
شرقت في كل الاماكن وغربت..
وما باقي الا يعلن الطيب مثواه
ياما على جمر المصايب تقلبت
وخذيت من حر الجمر أعظم أوصاه
أسعى ورى رزقي من السبت للسبت
واكنز من المعروف... والحمد لله