حمود التميمي وقصيدة غلا للعروس

ضمن فعاليات مهرجان حائل وفي إحدى الأمسيات تألق الشاعر حمود التميمي بقصيدة ( عروس الشمال ) التي قوبلت بالتصفيق الحار ..
دام ألغلا في قلوب العاشقين محبوس
ودام المحبة بوسط الروح مسكانها
بغليك .. بغليك يا حايل وبعطي دروس
للي جهل ديرتي ولاعرف شانها
حايل عروس الشمال وطول عمره عروس
في كل ليلة يزفونه بفستانها
حايل نفسها بخور وريح بن محموس
والعود ريحة منازلها وبنيانها
حايل ضياها بعيني مثل ضي الشموس
لاشفتها فرحتي تنفك بيبانها
ربيعها منوة اللي للمخايل يروس
لاغيّمت وأرعدت وانهل هتّانها
ثم فاح ريح النفل وارخى على الشمس قوس
به كل الالوان والما شق وديانها
ياما حلا ضلعها لاغازلته الطعوس
والعشب يملأ شغاياها وريضانها
والليل لاصارت القمرا سواة الكبوس
هاضت وفاضت مشاعر كل خلاّنها
ولاجيت أهلها ونعم بطيبين النفوس
صيت وكرم والشهامة طبع سكّانها
ماهو أنا من يقوله قالها من يدوس
بأرضه ومن زار حايل قدّر أثمانها
حايل غنية عن التعريف ماهي دسوس
من وقت حاتم وكلٍ يعرف أزمانها
ياديرتي مابعيني غيرك إنتي عروس
دار الوفا والكرم رمزه وعنوانها