حب وأحلام

ساهرة والليله القمرا ضياها ما اروعه
جوها الساحر خيالي بالعيون الشاعريه
تاجها بدر اكتمل والنور توج مطلعه
صارت الدنيا بنوره والليالي سرمديه
ساهره واوراق شعري بالشجن متشبعه
وابتسم والحزن يشعل بالصدر نيران حيه
اشعر بحزن حرق لي خافقي بين اضلعه
يخنق انفاسي يثور الدمع بعيون شقيه
الحبيب اللي يغيب وخافقي ما ودعه
مايبي قلبي يعاني من كثر عطفه عليه
ما درى ان الروح تسكن داخله تجري معه
وان قلبي وسط صدره ينتفض صبح وعشيه
عشت بأجواء المدينه سحر معه استمتعه
بليل مشحون بعواطف حب واحلامّ هنيه
معه احس الكون ملكي و النجوم مجمعه
عقد ألماس وجواهر قدمه حبي هديه
الحبيب اللي بعشقه صرت بنت مدلعه
واعرف اني كنت حلمه بالحلا والجاذبيه
واعرف اني وسط قلبه جالسه متربعه
صرت حبه نبض قلبه صرت له روحّ وفيه
ضاميه والحب صافي أشربه من منبعه
ما تكدره الشكوك السود وظنونّ غبيه
إيه ياحساسي تطرف قل جنون مولعه
بحبه لحد الثماله لين تأتيني المنيه
افتخر به (فخر حاتم) بالكرم في مجمعه
وما علي من الحواسد، من جعلني له قضيه
كنت أسهر له وأكتب فيه شعري واسمعه
يرسم بريشة غرامه حلم يجمعنا سويه
وصرت أسهر منفراقه من جروح موجعه
ينزف الخفاق منها دم ودموع سخيه
يا كل الهوجاس صبري والعوصف تزرعه
وسط قلبي والجروح بداخله حمرا نديه
لكن احساسي بقربه رغم بعده زوبعه
تجرف الأحزان معها والهواجيس الخفيه
دام حبه (أكسجيني) قل فصولي الأربعه
له فيافي القلب تزهر بالحياة العاطفيه
فارس احلامي احبك حب قلبي منبعه
حب يتحدى التصور والحروف الأبجديه