نور الحقيقة

حان الوداع ولا بقى للعتب دور
الله لنا وفجوج ربك وساعي
دام الصداقة ما هي إحساس وشعور
مال الصداقة بعد هاليوم داعي
قلبي على المقفين ما هو بمجبور
من باع للعشرة مصيره يباعي
رح واعتبر نفسك مسامح ومعذور
قلبي على كثر الخطا ما استطاعي
انا على فرقاك بالعكس مسرور
مثلك خسارة فيه دمع الوداعي
وش عاد لو خاطرك ضايق ومكسور
مدام خيبت الرجاء والمساعي
ما كنت اصدق فيك يا ضايع الشور
دايم وانا دونك مكثف دفاعي
وكانك على ما قايل منهي ومأمور
بدري على شرواك لويت ذراعي
فنجالك اللي سقت من يدك منثور
لا صار ما انته للصداقة مراعي
مَن يخدم الأنذال ما هو بمشكور
ومن يزرع الصبخا جداه الضياعي
توي لقيت لعلة النذل دكتور
البعد عن شوفه يزيل الصداعي
ما فيه داعي ينفضح كل مستور
عيني تشوف الدرب والقلب واعي
نور الحقيقة بان والعلم مخبور
شفت السباع وشفت روس الأفاعي
افلح.. قبل يضربك رمحي على الزور
وتلقى شبيهك يا خبيث الطباعي
عين بكت فرقاك تحرم من النور
لا تنتظر بعد الوداع اجتماعي