ليلة البارح

تطاول وقتها واصبح ليال
تاهت الشمس ومدار الشرق صارت تجهله
وكل هم يزور قلبي لو زمان البعد طال
للخفوق يعود كنه له مع الظلمه صله
تجتمع من كل شكل ولون وتهب الشمال
عاصفة تسمع لها بالصدر صوت وزلزله
وبسما عقلي تطير اسراب من فكري خلال
عصفها والريح تفزع كل طير وتجفله
وكل عصفورة تطير بخوف رجتها محال
برغم إغراء الأماكن وازدحام الأسئله
لو بغيت ارسم وش ارسم والرسم نصفه خيال
ونصفه الثاني جروح وحزن ودموع و(وله)
يا قصيدي لو بغيتك ما تجي في كل حال
تترك السهل القريب ولو سواك استسهله
تعشق الصعب البعيد، تموت بصعود الجبال
ولك مقام لا حضرت الكل قام وفز له
ولا رقيت اصغر طموح لك قريب الاحتمال
أمنية قلبك تكون سهيل قدر ومنزله
يوم بعض الناس عني تاه في دربه ومال
يا صديق في وفائك اختصرت الأمثله
جيتني تمشي بدربك واثق الخطوة عدال
واختزلت اسمى شعور في خفوقي أحمله
أعرف انك (بالقياس لتجربة بنت الرجال
وعمرها الوردي) زمانك ما يزال بأوله
شيلتك الهم بدري في زمان الانخذال
لين شفت شلون بعض الناس حظه يخذله
يا قصيدي، والأماني بعضها صعب المنال
صعبة تحوز بطموحك كل شي تأمله