سيد ضلوعي

سما ياحرفي الراهي تشوف أن القصيد سباق
سما يله نبي ناخذ أنا وياك تحليقه
إلى حضرة جناب اللي مع درب الهوى منساق
نصيحة كان تسمعني طريق الحب توهيقة
أنا أللي ذاق مر الحب .. مرار الحب ما ينذاق
أنا أللي من ردا حظه سطى الجرح بمعاليقه
تعبت اراوغ جروحي وعذاب الحب ما ينطاق
تعبت اضغط على قلب(ن) يموت بشوف عشيقه
تعبت أمطر هماليلي على غصن(ن) بدون أوراق
تعبت أسقي زماليقه ولاتزهر زماليقه
وصلت آخر مداهيل القصيد بآخر الآفاق
درست أجمل تفاصيله وعرفت شلون تطبيقه
بخيالي ماطرا رجعة خيالي للقصيد رواق
طموحي يابس(ن) راسه وأكيد البعد ما يعيقه
لو أكتب ما تيسر دفتري بأصغر حروفي ضاق
ولو أقرا ماتيسر لي تعبت بكثر تدقيقه
على طاري القصيد أللي يجي من داخل الأعماق
كثير أحلام نحلمها ولكن صعب تحقيقه
أنا وحلمي توادعنا وداع(ن)ما وراه عناق
تركني مع ردا حظي ومشى مع قل توفيقه
وأنا وقلبي تعاندنا أنا صابر وهو مشتاق
يمين الله وهو قلبي تمر أحيان ما أطيقه
أفا ياسيد ضلوعي تفز لطاري البواق
أفا ياعيبة العيبة تبي خاين مواثيقه
أفا يا مضغة ضلوعي بعد ما تطعنك تشتاق
أفا تشتاق لعيون(ن) تخلت عنك بالضيقة
صحيح عيونها نجلا .. هنوف(ن)خدها الدراق
ولكن عيب يخضع له شموخ (ن) موت تدنيقه
أفا ياقلبي الصامل أخبرك ما تهاب فراق
وإذا يعني مزاياها مزايا صعب تصديقه
بغيته صادقه ليه ولا طاعتني .. بالطقاق
و لو قلت العسل ريقه .. وإذا يعني العسل ريقه
ممدوح الراوي