رجا,, وياس

,, اسم جديد في عالم النشر أما الشعر فتقول قصائدها انها متمكنة فيه,, اقرؤوا ما في قصائدها التي خصّت بها مدارات شعبية
جيت اعترف لك والزهر في يديني
ابغى اعترافي تشهده معي الازهار
جيت وعزايه عشق كامل سنيني
وشهقت لك باسمك ابي منك تذكار
ما ادري رجا أو ياس ما يعتريني
أو خوف قلبٍ ألمه كثر الانكار
لا جيت ابشترح لك غلاك وحنيني
بين الشفايف وقف الحكي محتار
اجمع كفوفي في يدك واحتويني
تحيي بداخل داخلي ظامي اقفار
برغم عشقي عارفٍ ما تبيني
وبرغم صدقي ردكم دائم اعذار
يا من تجاهلت المدامع بعيني
انا تجاهل ردكم لي باصرار
احب من حبك مواجع سنيني
واللي جمعني بك تراه اغلى الاقدار
يكفي تجاهل آهةٍ منك فيني
ودمع قبل تقضي يسابقك مدرار
باحساس عشاق البشر ياظنيني
جمعت لك في داخل القلب تذكار
جيت اعترف لك واعترافي يقيني
من حبك بقلبي نبت عشب وأزهار