(مسافات التعب)

تمضي الايام من عمري ثواني
والمسافه واتجاهاتي اماني
مثل حلم الليل امشي في دروبي
تدفع الاشواق قلبي للمواني
يامسافات التعب كيف النهايه
تعبت اقدامي وانا ضايق اعاني
كاس صبري وانكسر غصب بيديّه
بعد مافاض الحكي واقفى زماني
ياعيوني والسهر حفلة كئيبه
كيف اعود وغربتي صارت مكاني
كثر ماضحيت من اجمل سنيني
احتياجي كان بيدين الاناني
جيت غايب رحت غايب ويش تفرق؟!
يكفي افراحي طواها ماطواني
استراح الياس في سكة مسافر
واستباح الحزن مابين المحاني
ارقب الايام واحسب كم بقالي؟
وين اروح وكل من حولي نساني
ازرع الامال في ارض اشتياقي
واطوي الصفحة واعيش العمر ثاني
مثل حلم الليل طافت ذكرياتي
جرحها بين المحاني قد كواني
هي كئيبه واتركت فيني مواجع
واتركتني في حياتي شخص ثاني