جسر الوصال

يا نشوة الفكر خلي شاعر المهجر
يمسي على خير بالله لا تسرينه
وان كان همك بروز وزايف المظهر
عني تنحي شموخ الشعر ما هينه
أليا نويت القصيد وهاجسي عبر
عديت ضلعاً قليل اللي معدينه
وسميت باسم الله المعبود ثم أدبر
شعر قبل ما أذكره تغوي شياطينه
الشعر جسر الوصال وسكة المعبر
لهموم صدر نوى يطلق مساجينه
ولا كل هم على سمع الملا يذكر
بعض المكاتيب يفهم من عناوينه
والعاشق اللي يهيم بدنيته مغتر
ما يدري أن الزمان إفناء سلاطينه
ومصير الإنسان مهما اغتر وأتكبر
يرجع إلى أصله واصل العبد من طينه
ويا الله عفوك نهار العرض والمحشر
ولطفك بعبدك اليا خفت موازينه
وتجزيه يا سامع المحتاج والمضطر
روضاً تغني طيوره في بساتينه
ويا نشوة الفكر خلي شاعر المهجر
يمسي على خير لا يطلق مساجينه