ورد الغلا

جيتك بعيد الفطر أبارك وأهنّي
ياالله عساك بكل الاعوام مرتاح
ويا علك إبعمرك تعيش إمتهنّي
ويصير وقتك كله أعياد وأفراح
يا صاحبي جيتك من البعد أغنّي
وأصدح بصوت القلب أبا اشكي لك إجراح
الصدر يصرخ والليالي تمنّي
وباب الزمن مصنوع من دون مفتاح
الحب الأول مات في صغر سنّي
وثاني.. وثالث.. كنّها نزعة أرواح
ورفيقي اللي محسنٍ فيه ظنّي
سكّنته إبعيني ويا للأسف طاح
والقلب ما به قلب.. شيٍ يونّي
مهمته في جوفي آهات وصياح
يا صاحبي ورد الغلا جاك منّي
وردٍ على ما قيل غالي وفوّاح
أنت الرفيق اللي من اسمه فتنّي
وجيت اشتكي لك علّ هالهم ينزاح
وخلك بلا هالحب عيش إمتهنّي
ويصير وقتك دونه أعياد وأفراح