وصل وبعد

يازين خل الحب يرسي على حال
قل لي قرارك علنا فيه نرتاح
إما تعال وبدل الهجر بوصال
والا ابتعد وارتح وانا مثلك ارتاح
مثل السراب انتي على العين يختال
ولا جيت كنه ما تكون ولا لاح
اقطع على شوفه مسافات واميال
على امل القاك والهم ينزاح
تقرب وتبعد والثمن راحة البال
ادميت قلبي حزن واهات وجراح
والقلب مل الصبر في صد وقبال
منك ولادري وش نهايتك يا صاح
ترى الصبر ياثر على الحال لو طال
معاد أميز منك همي والأفراح
اما ظلام الحب والبعد قتال
ولا لقاء والوصل يا نور الاصباح
صالح عبدالله القحطاني