جينا نعزيكم

هذه قصيدة رثاء في فقيد الأمة خادم الحرمين الشريفين الملك فهد بن عبدالعزيز آل سعود رحمه الله واسكنه فسيح جناته:
بان الزراق ولاف الأعماق لايف
لوف الضواري للدريك المطعن
أربع وجابٍ مطرحه بالحتايف
حاله عطيبٍ ينهض الحيل ويون
وليا تنهض كن الأعضاء قصايف
يثوي تقل عودٍ طوى عزمه السن
دارت علاه صروف دهرٍ محايف
خلنه الاضعان ثاويٍ وراهن
خلو معه جربٍ ثلاثٍ عجايف
خافوا على عوص النضا من جربهن
لا زاد لا مشرب يبل الجفايف
والعود نجمه غاب والهجن دركن
غدا جثي فقارهن بالضفايف
توحي صفير الريح يسحل عضاهن
ويامل همٍ ساحلٍ بالنحايف
برا الضلوع العوج حتى نحلهن
غديت مخيولٍ ردونه رفايف
ما غير عودٍ وسقه رقاع يومن
ولذ الكرى كنه من الموق عايف
وكن الهموم بثومة الجاش يرعن
رعي الجراد الجومحان الزوايف
زافات لن فاعن سنا الشمس يدكن
ولن حولن فوق المرابع دفايف
خطر علاهن بزغة الضوء يسنن
امست حطامٍ بالهبوب العصايف
تشدي معاليقٍ يوحش محلهن
صكات بقعا للحنايا قصايف
واضيم حالي من بوادر بلاهن
راعتني الدنيا وذقت الكلايف
لاعتني بحرٍ وصوفه يهولن
فرقه عن الأحرار عدة وصايف
ندر الوصايف يفرقنه علاهن
رجاح عقلٍ نايدٍ بالحصايف
وسطوات جاشٍ كان الأمهار غارن
لا حولن بالهيج هذمٍ خذايف
وفروا بواتيع اللقى من لقاهن
هابو لقى مروين حد الرهايف
الفهد يرسي تقل حيدٍ مهيمن
مهيمنٍ فاق الحيود الحقايف
طودٍ منيعٍ حزة الخوف مزبن
غيث الهلاكا بالوقوت الشحايف
وجود النسب يميزه عن نسبهن
مجنى الحرار معربات السلايف
ساسه جويدٍ بالاصاله مقنن
عزاه يا طيرٍ بشعف النوايف
حرٍ مخاليبه ما يرفا عطبهن
واطيرنا النادر علاه الحسايف
حل القضا به والمنايا يلوعن
لا يا وجودي وجد خمسٍ صلايف
امسن بضيم وفوق اهلهن ينوحن
اشتالهم سيلٍ يقض الشظايف
وانجاهن الله حين بالرجم علن
المال والمذخور غادٍ نتايف
عقب ثمان ليال بالريع شيفن
وسق العواسق نيطلانٍ جوايف
وعلاهم الخفرات بالويل جضن
جضت قريصٍ في وريده عذايف
يونس شواظٍ بالعمايق يدكن
وانا يدك بلب الأعماق طايف
هواجسٍ جوف الضماير يطوفن
على فراق الطير زادن زحايف
زحف السرايا في نهار المكاون
واطيرنا النادر في بيض اللفايف
قفوا بجثمانه بالاثنين مكفن
والبشت الأشقر للجنازة لحايف
متنٍ زهاه البشت بالعود يدفن
وسق النعش شالوه يوم الحتايف
والرب قدر والمخاليق تومن
وللحد ساروا به خيار الخلايف
أخوان وعيال على الفهد حزن
ويمناً تكفل باليتام الضعايف
حطت حدر خده يوسد طرفهن
وجه على القبله من كفوف رايف
وكشف عن الوجه السفير الملقن
لقن شهادة حق قدم المهايف
قبل الوداع برحمة الله نطقهن
وهالوا تراب القبر فوق النشايف
ونصايبٍ ثنتين للميت رزن
وقفوا حزاناً والمحاجر ذرايف
والله لنبطي والمدامع يهلن
واطيرنا النادر ولاني بخايف
الغيد ما جابن حليه ولا كن
ما كن مثله بالدهور العنايف
فرقه عن زحول الجحاجيح بيّن
مبداه بدرٍ بالشهور النصايف
وغيره نجومٍ في سماهن يويقن
ولا قصور بخيار القروم العرايف
والشاهد الله خافقي ما هذبهن
مير الفهد صيته في بلج الصحايف
فعلٍ بمدلول المكارم مدون
واطيرنا النادر وقار المضايف
ليا حكا روس النشاما يقرن
يا الله يا منشي المزون الهتايف
تكتب لابو فيصل بالأفنان مسكن
مرحوم يا ستر البني العفايف
يا عزهن بالمكربه يا سعدهن
مرحوم يا مجري القلوب الرجايف
تقدم ليا نقوى المناعير هابن
وتفزع ليا من حاف بالجار حايف
تشفى الغليل وللمعادين تغبن
والله ما ننسى جزيل الوقايف
وقفات زحلٍ بالمعاليق اثرهن
عنده عظيمات الدهايا خفايف
وليا ارتكى هاز العضال ونقلهن
هدلان يشهد له نهار الكسايف
بالهيج خضب حد عضبٍ مسنن
ودسمان رده يوم نسف القذايف
وفيالقٍ يوم المكاون يجوحن
كلٍ شهد له في نهار النكايف
عوق العديم اليا صهل كل معتن
له رايةٍ رفت بوسق الشعايف
وقدره بمكنون الضماير تمكن
والشاهد الله ما نقول الزوايف
جينا نعزيكم ولا نخلف الظن
عزا وبيعة من عموقٍ نضايف
بيعة عتيبيٍ بالأشهاد تعلن
عيد بن شريم بن صقر الروقي العتيبي