ترثة خلف

في رثاء الفريق الركن بندر بن عمر بن ناحل -رحمه الله-
يا لله ياللي تسجد الخلق لرضاه
يا واحد كل البشر تلتجيله
يا عالم سر الدهر مع خفاياه
منجي رسوله من قريش وخليله
تجبر عزانا في فقيد نعيناه
بندر بن ناحل فقيد القبيله
رحل عن الدنيا وقفت مطاياه
في يومه المكتوب ساعة رحيله
أمرا من المولى علينا قبلناه
أمرا على صبره نقول تهليله
الله أكبر سنة الخلق يا إله
أمانته من دار لدار بديله
اختاره الله والكريم انترجاه
في جنة الفردوس تحسن نزيله
عفوك وغفرانك عن النار تحماه
بحسناك يالمعبود منجي دخيله
مرحوم ياللي ما تعدد مزاياه
ذاك الفريق اللي فعوله جزيله
لجل الوطن والدين صدق الموالاه
خادم مليكه بالفعول الجليله
صخر جهوده للوطن حق وأوفاه
وأفنى حياته للعمل في سبيله
خدمة بلاده لابس التاج يزهاه
وسام الفخر لجل الوطن من دليله
ولي عهد المملكه حضر ينعاه
وخفف مصاب أهل القلوب العليله
ما هي غريبه سيدي زاير ابناه
روح الابوه في ضميره فصيله
الله يثيبه والحسنات يجزاه
ويرفع مقامه كل خطوه فضيله
ياوي والله شخص في ذكر طرياه
منصب وشيخه في عريب السليله
يحسب مكانه عند الأخيار له جاه
ومحاسنه تذكر ويذكر جميله
بيت الكرم والجاه والناس تنصاه
واهل الشفاعه واللوازم تجيله
ترثة خلف راع الكرم شاع ذكراه
شيوخ الاحامد محتمين الدبيله
ما فيه في وقته يعطي عطاياه
يعطي العطايا في زمانه نحيله
مهد البكار اللي لها الوسم عرقاه
يشهد بها ديوان حايل وجيله
يوم الزمان اللي على نجد بلواه
مداته الجزلات ما هي هزيله
مرحوم يا بندر تليد المسماه
الموت ما أمهل كاسبين النفيله
الله يبيحه ويتجاوز خطاياه
ويجعل عياله بالمكانه مثيله
يبقى خلفهم بالحرار الظراه
من منهجه نهج الحرار الاصيله
وصلاة ربي عد سحب نثر ماه
على الرسول الهاشمي وتهليله