(8) رسائل برائحة الوطن

الأولى: (إلى ولاة أمرنا)
نفدي الوطن وأرواح من راحت شهود
ولأجله نشوف الموت مثل العافيه
يا خادم البيتين يا فهد الفهود
الله معك ثم الشعوب الوافيه
وعبد الله وسلطان وافين العهود
أفعالهم لأجل المواطن كافيه
ونايف معه سلمان يا طيب الجهود
قلوبنا معكم قلوبٍ صافيه
الثانية: (إلى رجل الأمن)
رجل الأمن قلبي معك وين ما أروح
وعيوني اتراقبك من وين ما رحت
أهديك تقديري والاعجاب بوضوح
باسم جميع الشعب لك بالغلا بحت
وش أكثر أنك للوطن تهدي الروح
وانك لو انك توصل الموت ما طحت
ان عشت في عز للأمجاد ممدوح
وانت مت مستشهد على عز وافلحت
الثالثة: (إلى كل أب)
يا الأب لك دور كبير ومكانه
بالمجتمع دايم على مر الأجيال
محدٍ يشكك في وفاك وحنانه
معروف دورك عبر الأجيال فعال
عيالك تراهم في حياتك أمانه
فاحرص عليهم من خبيثين الاعمال
واجب تراقبهم بحزم وليانه
من قبل تجرفهم متاهات الاهمال
الرابعة: (إلى كل أم)
كل أم تعرف عن شعور الأمومه
ما ينوصف لو قيل في نثر واشعار
تسهر يوم ان الغير يهنى بنومه
لا غاب عنها ابنها نومها طار
ولا الوم قلب الام محدٍ يلومه
تحرص على ابناها من افكار الاشرار
بس لا حظيه ف روحته مع قدومه
من قبل يجتاحه من الغدر تيار
الخامسة: (إلى كل إمام مسجد)
المساجد دورها دورٍ كبير
والإمام كلن يتابع وش يقول
لازمٍ تحرص على النشء الصغير
ولازم تبحث معه كل الحلول
ما تخلي له مجال انه يحير
يا مشايخنا لكم دور وقبول
بالمواعظ فهموهم وش يصير
لكل من له بالخطا درب ميول
السادسة: (إلى كل معلم)
المدرسة يا ناس مثل المناحل
تنتج عسل صافي ولا فيه تزوير
المدرسه للابن مثل السواحل
عن الغرق يأمن بها من يبي الخير
وعلى المعلم في جميع المراحل
يلاحظ على الطلاب لو صار تغيير
لازم يتابع كل قادم وراحل
ويكثف جهوده وله كل تقدير
السابعة: (إلى كل فرد من أفراد الفئة الضالة)
رساله لمن حارب بلاده وطاع اعداه
إلى كل شخص بالخطا ضاع عنوانه
رساله مثل ما قال نايف عزيز الجاه
عباره صريحه قالها الشيخ بلسانه
ترى كل تايب نادم معترف باخطاه
يعامل بلطف لو رجع داخل اوطانه
وانا اقول فرصه يا شباب جهل مبداه
تراجع عن افكار الذي طاع شيطانه
الثامنة: (إلى كل مواطن ومقيم)
يا المواطن وطنا يستحق الكثير
من تفاني مع الاخلاص حب وولا
شي ما هو بعادي ف البلد وش يصير
من طغاة تراهم ع البلاد دخلا
وانت دورك الى استخدمت دورك كبير
خل دورك يشوفه كل جمع الملا
وكل شخصٍ مقيمٍ في بلدنا بخير
واجب انه يساهم في بلاد الغلا