عساه بالفردوس

هذه القصيدة في رثاء الفقيد/ شارع بن قاعد الوهاب رحمه الله
يا لله يا خلاق كل المخاليق
الواحد المعبود جل جلاله
يا فارج الكربات في ساعة الضيق
ما يخيب عبدٍ وحّده والتجا له
يا معيد للدار المحل بالزماليق
تعيض قاعد في فقيدة عياله
وتجبر عزا هاك القلوب المحاريق
ابوه وامه والاخوان وخواله
وارفع عزايه للرجال التفافيق
عمامه أهل المرجله والشكاله
مرحوم يا لاشقر طويل المسابيق
عساه بالفردوس ما هو لحاله
الله يوسعله قضيف الطواريق
لياما يرد حوض النبي في حباله
عساه بالعروة وثيق المعاليق
آمين يا من كل حي يساله
يا مرسي روس الجبال الشواهيق
عقب اهتزاز الأرض مرسي جباله
تربط على قلبٍ لحقته ملاحيق
عسى عوض ماراح باللي بقاله
لو صارت الأيام مثل الغرانيق
لا بد من يوم يكدر جماله
ولو صدت الأيام لابد وتويق
ماحدٍ سلم منها على كل حاله
احدٍ تحده للزعل بالتفاريق
والثاني اللي تزعله في حلاله
دنيا الورى بواقةٍ للمواثيق
ما يامن اللي يفهم العلم جاله
تسوقنا سوق البليهي ليا سيق
والامثل سوق الرشا للمحاله
الله يختمها على حسن توفيق
حسن الاجابه يوم يطرح سؤاله